الجمعة، 8 مايو، 2009

فتى / فتاة أحلامك


السلام عليكم ورحمة الله وبركاته

هناك مواصفات لكل فتى وفتاه فى شريك عمرها
طبعا بيبقى فى مواصفات أساسيه لا يمكن الاستغناء عنها فى الشخص اللى هترتبط به وكذلك هناك مواصفات ممكن نتنازل عنها او انها مش مهمه اوى يعنى مش اساسيه
وطبعا المواصفات دى بتختلف من شخص لآخر كل واحد على حسب الشخصيه اللى يقدر يتكيف معها

كنت أشاهد برنامج على احد القنوات الفضائيه كان البرنامج بيتكلم عن الشباب اللى بتاخد عقارات او حاجه زى كده علشان يبقى لهم عضلات وكده علشان البنات تعجب بيه ويبقى منظر وشخصيه ال يعنى مش هيبقى شخصيه من غير العضلات ههههه المهم كان فى البرنامج حوارات مع البنات فكانت المذيعه بتسال احدى الفتيات فبتقولها الانسان اللى هترتبطى بيه لازم يبقى له عضلات؟؟؟ ههههههه سؤال غريب صح او يمكن مش غريب يمكن انا بيتهيألى انه غريب تخيلوا قالت لها ايه اه طبعا لازم
شفتوا صفات الزوج بقت ازاى وطبعا فى بنات لها مواصفات تانيه زى لون العيون وتسريحة الشعر يكون مفلفل مثلا او سبيكى والطول والوزن ........الخ من الحاجات اللى انا شايفه انها كده بتفصل فستان مش بتختار عريس او عروسه
وكذلك الشباب ممكن بيبقى مواصفتهم من هذا القبيل اللى هى مواصفات شكليه كلها ودى كلها مواصفات اساسيه بالنسبه لهم
وفى ناس تانيه بتنظر للماديات هيبقى عنده شقه كام متر وموديل العربيه وفى الحاله دى فى بنات كتير بتوافق على رجاله ممكن فى سن والدها او اكبر منها بعشرين سنه على الاقل ومفكرتش فى يوم من الايام انه ممكن ده كله يروح فى لمح البصر وكذلك الشباب ممكن يتجوزوا ستات فى سن والدتهم كل ده علشان المال وكمان ممكن يكون شاب مناسب لها فى السن وتوافق عليه علشان مادياته تمام التمام واخلاقه فى الضياع
وعمر السعاده ما كانت بالمال
وللأسف نسينا أو تناسينا قول الرسول صلى الله عليه وسلم ( اذا جاءكم من ترضون دينه وخلقه فزوجوه )

وكلنا عارفين وشايفين نسبة الطلاق والخيانات الزوجية اللى منتشرة جدا فى عصرنا ده وكل دا بسبب الاختيار اللى من غير أى أساس دينى أو أخلاقى كل أساسه كان مبنى على حاجه هشه زى بيت العنكبوت اى حاجه تأثر فيه وتهدمه فى لحظه واللى بيضيع فى الاخر أطفال ملهمش أى ذنب فى كل ده

لكن الأخلاق والدين أساس قوى مش أى شىء يأثر فيه بسهوله لأنه قائم على تقوى وبركة من الله عزوجل بعيدا عن الشيطان
طبعا فى مواصفات اساسيه تانيه لا يمكن الاستغناء عنها من ناحية المستوى الفكرى والثقافى والشخصيه واخر حاجه الشكل طبعا يبقى مقبول الشكل مش شرط بقى لون العيون والحاجات دى

ياترى انت او انتى هتختار على اى اساس؟؟؟

هناك 19 تعليقًا:

Jannah يقول...

لو كانوا بنات 15 أو 16 17 سنة فأوكي
لكن لو بنات و شباب فوق 25 مثلا و يتكلمون في عضلات و لون الشعر فهذا شيء مؤسف جدا
وعلى حتى لو ما ظهر في البرنامج ناس في سن ناضج يتكلمون عن العضلات و شكل المناخير فهم موجودين في الواقع بالفعل و كتيييير
والسبب من ضمن الأسباب الاعلام اللي يسطح الناس و يهيفهم
الله يصلح الحال

Soul.o0o.Whisper يقول...

السلام عليكم و رحمة الله و بركاته

صمت الحنين /
ربنا يبارك فيكى يارب

فعلا موضوع مهم

طبعا المجتمع اللى الواحد بينشأ فيه بيشكل مفاهيمه و ثقافته
و ناس ماشفتش من الحياة غير التسريحة و لون العنين و المواصفات الجسدية
فطبيعى انها تختار على اساس المواصفات الشكلية ..
ناس اتربت على الماديات هتختار الماديات

ناس اتربت فى وسط ملتزم و متدين
هتختار المتدين




فربنا يهدى الجميع
و يردنا اليه ردا جميلا

و ربنا يرزقنا بمن يرتضيه لنا


دمتى بود يا جميلة

وردة يقول...

ايه ده
في بنات بتفكر كده
هو ده مقياس الرجولة في وجه نظرها
الاخلاق والتربية راحت فين
الدين وتحمل المسئولية
الشهامة والرجولة
الحب والحنية
ده في حاجات كتيييير جدا مش من ضمنها الشكل اكيد
ربنا يستر علينا جميعا
موضوعك جميل تسلم ايدك
سلام

احساس طفلة محبة للرومانسية بس واقعية يقول...

دول لسة تلاقى بنات صغيرين
مش عارفين معنى الحياة والمسؤلية
ما هو لو عرفين اكيد هيعرفوا ان لون الشعر والعضلات مش بتفرق فى حاجة
دى شكليات زيها زى باقى كماليات المنزل

الحمد لله مفيش احسن من حد بنحبة
عارف ربنا وعندة اخلاق
وكل حاجة بعدها تهون
:)

تقبلى مرورى

حياه بلا عنوان يقول...

السلام عليكم ورحمه الله وبركاته

البوست جميل وبيحكى شويا عن الواقع
بس فعلا الانسان عمره مكان بالشكل ولا استيلو الاهم انو يكون عارف ربنا ويقدر كل شىء لكن التفكير اللى الناس بتفكر فيه ده اسوؤ حاجه طبعا تحياتى

ghorBty يقول...

صمت الحنين

اعتذر لطول الغياب ...

امممممممم الاختيار واساسياته في زمن طغي فيه الماديات والاهتمام بالمظهر دون الجوهر ..

عواقب الاختيار علي هذه الاساس واضحه جدا وللجميع فهل من مبصر .. ربنا يهدي الجميع


اما بالنسبه لاساس اختياري اكيد طبعا بعد الرد المعروف نفسي بجد في

انسان ذو حياء والحياء يحوي الكثير
ويكون انسان طموح وعايش لهدف
وما يكنش تقليدي يعني يكون متميز عن غيره
ويكون موسوعه من العلم والمعرفه

وربنا ييسر الامور والاحوال ...

ويسعد قلبك بما تحبي غاليتي ...

موفقه ان شاء الله

موناليزا يقول...

"اذا جاءكم من ترضون دينه وخلقه فزوجوه"
لن اجد خيرا من نصيحة النبى عليه الصلاة والسلام

شباك موارب يقول...

اول حاجه مرسي جدا للزياره
واتمنى دوام التواصل
مدونتك رقيقه جدا جدا
ربنا يبارك فيكي
بجد والله انا هاقولك حاجه انا نفسي اعرف شخص اخلاق اخلاق بمعنى الكلمه
عشان هو لو اخلاق بغض النظر عن اي حاجه تانيه هيراعي ربنا فيا ويعرف ازاي يحافظ عليا ويقدرني ويحترمني
ربنا يحقق لينا كلنا اللي بنتمناه

شباك موارب يقول...

صحيح اهم حاجه طبعا عارف ربنا
والاعتدال وسط برضو
مش اوفر اوي وكمان مش فاهم الدنيا غلط.....

لو عندك حد كدا ابعتيه؟؟؟؟
هههههههههههههههههههه


سلامي

منار فايد

ايوشة يقول...

للاسف فى كده كتير الشكل والمادى شئ مهم بالنسبة ليهم بس دى مش مواصفات يتنبى عليها بيت صح اكيد هنتهى من قبل ما يبداوا اصلا

سمكه واحده يقول...

السلام عليكم ورحمه الله وبركاته
بصي هقلك
سيبك من كل الكلام ده
وطبعا اهم حاجه قول نيبنا حبيبنا محمد عليه افضل الصلاه والسلام
واقلك علي حاجه
لو جالك واحد وجردتيه من مركزه ووظفته وحياه الاجتماعيه والماديه
وسبتيه لشخصه وثقافته وفكره وبصيته كده وفكرته ولاقيتي نفسك قلتي هو ده
تقدري تعيشي معاه متقرفيش منه تستحمليه تقبلي منه اي حاجه
سيبك بقي من اي حاجه تانيه
هو ده تعيشي معاه في اي مكان
انسي
المهم يبقي راجل
في معاملته واسلوبه تفكيره زوقه اخلاقه اي حد يشوفه يقول عليه رجل بمعني الكلمه مش هنستهبل ونقول الفلوس مش كل حاجه لا تبقي حاجه معقوله ضمنه ان مستقبله يبشر بالخير طبعا الضامن ربنا سبحانه وتعالي
بس انا اهم حاجه عندي في الرجل
1_الالتزام وعارف ربنا بمعني الكلمه مش
اسم وصلاه وصوم ومفيش فاهم في المعامله
2_الطموح ثم الطموح حتي لو شحات بس عاوز يعمل حاجه مش مأنتخ ولوح كده وقاعد في مكان
3_ غيور دي مهمه جدا يغير علي اهل بيته
تحسيه معاه كانك طفله يعني مش خايفه من اي حاجه في الدنيا
زي الاطفال ما بتمسك ايد باباه حاسه انه هولاكوا وهيدمر الدنيا وحاسه بالامان
4_الرقي في المعامله في الاسلوب في جوانب الحياه كلها
5_احتواء وامان وحنيه
6_الثقافه مهمه جدا جدا جدا مثقف هو اللي يعلمني ويعرفني علي الاشياء اكون من خلاله اتعرف علي عالمي الجديد زي سائحه يعني مثقف عني ومتدين عشان يحق له القوامه
مش مهم معاه فلوس بس سخي يديكي عنيه
بس بلاش تخديهم امال هيشوف ازاي ههههههه
بصي لو لقتيه اي كلام بيقوله عبيط ولا مهم بس محترماه وحاسه بأهميته وعندك غير اي حد يبقي هو ده الرجل
طبعا الشكل يكون مقبول والله لو حبتيه وفيه رحمه وموده واحترام
مش هتشوفي غيره وكانه اوسم راجل في العالم
في الاخر
الرجل هو
الامان الاحتواء الحنان الرقي
بس بقي كفايه كده انا رغايه بشكل
تحياتي

د. ياسر عمر عبد الفتاح يقول...

إيه العالم التافهة دي
عضرت إيه وبس ولون شعر إيه

ربنا يهديهم

الفراغ يقول...

سلام عليكم
انا مع تعليق سمكه واحده
وربنا يرزق كل البنات بالراجل الشهم الحنون
الجدع الكريم اللى يخاف من ربنا واللى يقدر المسئوليه واللى يقدرها ويرفق بها كما قال رسول الله صلى الله عليه وسلم( رفقا بالقوارير )
وطبعا فى اساسيات كلنا عارفينهاولا يمكن التهاون فيها..زى الصلاة والصوم وبر الوالدين والامانه والاستقامه وعدم التدخين ..وفعلا لازم يكون مصدر للثقه..وتقيل مش هايف ..وشكله مقبول ومناسب علميا واجتماعيا
وعموما (من يتوكل على الله فهو حسبه)

تحياتى واشكرك على الزياره

غروب يقول...

بصراحه الموضوع ررررررررائع جدا

بس مش عارفه ليه في الفتره الحاليه مش قادره احدد الشخصيه اللى انا عاوزاها

بس الاكيد انى عاوزه واحد يراعي ربنا فيه

اذا حبنى يكرمنى واذا كرهنى لا يهنى

لكن المواصفات الشكليه اعتقد دى هيافه اوى غير انى بقرف من العضلات دى اوى

تحياتى يا قمر

وكيلة نيابه مع ايقاف التنفيذ يقول...

حقيقى بوست هااااايل جدااا ياحنه للاسف فعلا ده بقى كثير من الشباب يهمه الشكل واللبس والعبط برده مفيش مشكله هههههه
اما البنت بقى مصيبتها ادهى وامر فى اختيارها لشريك حياتها ببقى حاسه بجد انها عبيطه ولا بتستعبط متفهميش؟
لازم ولا بد شعره يكون مضروب فى الخلاط وياسلام لو عليه شويه مانجه هههههه كوكتيل هايل شفتى الهبل اللى وصل ليها حال الشباب والبنات
عموما انا مش طماعه عاوزة بس واحد ابن حلال كده يكون بيحب يكوى الهدوم لان بكره اكوى هههههههه وياسلام بقى لو يكون بيحب يدخل المطبخ ويرحمنى من اى حاجه ممكن بتتحمر فى الزيت هههههههه
مش فاهمه امال انا هبقى لازمتى ايه
بحييكى بجد على البوست الجميل ده

hager za3bal يقول...

لا طبعا
مش معني ان في ناس كده انكل الدنيا كده..

يعني هي هتتجوز الشكل والفلوس؟؟!!
هي رايحه تشري شركه ولا ايه؟؟!!

طيب اقولك علي مثل كنت بقوله لاي واحده بتفكر بالطريقه دي:

يا واخد القرد علي ماله يغور المال ويفضل القرد علي حاله.. - طبعا مع الاعتذار للقرود -


تحياتي

صمت الحنين يقول...

Jannah

لا مش بنات 15 و 17 سنه بس اللى ممكن بيفكروا كده لا فى بنات فوق العشرين وبيتكلموا عن الشكل والحاجت دى للاسف
تسلمى على مرورك

____________

Soul.o0o.Whisper

وعليكم السلام ورحمة الله وبركاته
ويبارك فيكى ياسول
وطبعا البيئه والمجتمع لها تأثير على تفكير كل فرد فيها
وربنا يتقبل دعائك يارب
دمتى بكل خير سول

_______________

وردة

للاسف فى بنات بتفكر كده
والاخلاق والتربيه دى اخر حاجه بيفكروا فيها
تسلمى على مرورك ورده

_________________

احساس طفلة محبة للرومانسية بس واقعية

مش بنات صغيرين ولا حاجه بس تفكيرهم هو اللى صغير
وعندك حق لو فهوا الحياة صح ومسئولياتها مش هيفكروا كده
تسلمى على مرورك

________________

حياه بلا عنوان

وعليكم السلام ورحمة الله وبركاته
طبعا اهم حاجه فى الانسان دينه واخلاقه
تسلمى على مرورك

___________________

ghorBty

ولايهمك ياقمر
اكيد الاختيار بيتوقف عليه حاجات كتييييير جداااوبيكون سبب فى نجاح او فشل الحياة الزوجيه
يارب يرزقك بزوج صالح فيه كل المواصفات اللى ذكرتيها ويسعدك ان شاء الله
منورانى ديما ياغربتى
دمتى بخييييييير

___________________

موناليزا

واكيد اللى هيعمل بنصحية الرسول صلى الله عليه وسلم هو الفائز واكيد مش هيخسر

تسلمى على مرورك

______________

شباك موارب

وربنا يبارك فيكى يارب
ومرسى لذوقك
ويارب يرزقك بالزوج الصالح اللى يحافظ عليكى ان شاء الله
واكيد لازم يبقى عارف ربنا وفاهم الدنيا واول ماحد ياقبلنى فى مواصفاتك دى هبعتهولك علطول هههههههه
تسلمى على مرورك

___________________

ايوشة

اكيد الشكل والماديات عمرهم ماكانوا اساس يتبنى عليه اى بيت واسره لازم يكون اساسه قوى مبنى على الدين والاخلاق

____________

سمكه واحده

وعليكم السلام ورحمة الله وبركاته
واهم حاجه طبعا قول الرسول صلى الله عليه وسلم
وربنا يكرمك ان شاء الله ويرزقك بالزوج الصالح يكون فيه كل المواصفات اللى قولتها
تسلمى على مرورك
_________________

د. ياسر عمر عبد الفتاح

يارب يهدى الجميع
جزاك الله خيراا على مرورك


_________________

الفراغ

وعليكم السلام ورحمة الله وبركاته
ويارب يرزق كل البنات بالزوج الصالح ان شاء الله واكيد الاساسيات اللى ذكرتيه مينفعش التهاون فيها
تسلمى على مرورك

_____________________

غروب

ربنا يرزقك بالزوج الصالح ان شاء الله
تسلمى على مرورك
دمتى بكل خير

__________________


وكيلة نيابه مع ايقاف التنفيذ

منوره ياسمسمه اكيد اللبس والشكل والحاجات دى هايفه حلوه حكاية شعره مضروب فى الخلاط دهوالكوكتيل
وياااارب يرزقك بالزوج الصالح اللى يكرمك ان شاء الله
تسلمى على مرورك ياقمر
منورانى

_____________________

hager za3bal

اكيد مش كل الناس تفكيرها واحد
فى ناس كل تفكيرها فى الشكل والماديات
وناس تانيه تفكيرها فى الدين والاخلاق وشخصية الانسان نفسه
واكيد المثل ده حقيقى
تسلمى على مرورك

رعد يقول...

( اذا جاءكم من ترضون دينه وخلقه فزوجوه )
معيار اختيار الزوجة (إذا نظر إليها اسرته وإذا أمرها اطاعته وتحفظه في ماله وولده أثناء غيابه)

رعد يقول...

( اذا جاءكم من ترضون دينه وخلقه فزوجوه )
معيار اختيار الزوجة (إذا نظر إليها اسرته وإذا أمرها اطاعته وتحفظه في ماله وولده أثناء غيابه)